NAGA CITY- Prangkang sinaysay ni Camarines Sur 2nd District Representative LRay Villafuerte na pamumulitika an nasa likod kan mga akusasyon katakod kan suboot paggamit sa Emergency Shelter Assistance (ESA) kan Department of Social Welfare and Development (DSWD) sa amay na pangangampanya kan mga ini sa nasambitang probinsya.
Sa intrevista kan Bombo Radyo Naga ki Villafuerte, sinaysay kaini na mawot man sana sindang rautan kan mga kalaban sa pulitika tangani na maanggot sainda an mga namamanwaan.
Dawa gikan sa DSWD an ESA, segun sa kongresista, magkatabang sinda ni Governor Migz Villafuerte sa pag-follow up kan nasambitang programa asin mayo suboot sindang intensyon na ribungon an mga tawo.
Kun marurumduman, enot nang naghampang sa media si DSWD Bicol Director Arnel Garcia kun sain aminado ining dae ninda napag-andaman na pwedeng maggamit sa pulitika an saindang shelter assistance.
Katakod kaini, nangapodan na sana an direktor sa mga pulitiko an dae ipagtakod sa pulitika an programa kan nasambitang ahensya.
