Nagbutas na sa saiyang pwesto si Japan Prime Minister Shigeru Ishiba tanganing malikayan an sarong pagkakaparte sa laog kan saiyang partido, an liberal Democratic Party (LDP), sigun sa report kan NHK.
Si Ishiba, nagin prime minister kan nakalihis na Oktubre 2024 asin pinangenotan an sarong coalition sa tahaw kan LDP asin Komeito. Sa saiyang pamamayo, nawaran nin majority sa parehong mababang kapulungan asin halangkaw na kapulungan kan parlamento an saiyang coalition, kasunod kan kaangutan kan mga botante sa padagos na paglangkaw kan mga gastuson sa nasyon.
Huli digde, nawara an majority sa mababang kapulungan kan nakalihis na Oktubre 2024 asin an majority sa halangkaw na kapulungan kan nakalihis na Hulyo 2025.
Makalihis na madaog kan nakalihis na Hulyo, sinabi ni Ishiba na inako kaini an “magabat na resulta” kan eleksiyon alagad nagdesisyon ining magtinir komo prime minister.
Mientrastanto, nakatalaan man na magbotohan saaga, Setyembre 8, an mga miyembro kan LDP tanganing magdesisyon kun mapreparar nin sarong extraordinary leadership election.
Huli sa mga agam-agam sa political uncertainty, nagbaba an salapi kan Japan asin an pagpapabakal nin Japanese government bonds, kasabay an yield kan 30-year bond na naglangkaw sa pinakahalangkaw na lebel kan nakalihis na Miyerkules.
Dugang pa kaini, nakapokus man an posibilidad na maribayan si Ishiba kan sarong pamayo na matao nin mas maluwag na fiscal asin monetary policy, siring ni Sanae Takaichi, na kritikal pag-abot sa paglangkaw kan interest rate kan Bank of Japan.
Si Takaichi, nadaog ni Ishiba sa LDP leadership run-off.
Kasuarin sana, natapos ni Ishiba an sarong kasunduan sa Estados Unidos, kun saen nagpromesa an Japan nin $550 billion na pamumuhunan komo karibay kan pagbaba kan taripa sa sektor kan mga lunadan kan Japan.
