NAGA CITY- Nagtitinir na problema pa man giraray kan Julian Meliton Elementary School an pagbaha asin mga basurang natatambak.
Sa entrevista kan Bombo Radyo Naga ki Apollo Sebello, Principal kan Julian Meliton Elementary School, sinaysay kaini na kasuudma kasabay kan paglangkaw sa lebel kan tubig huli sa naeksperyensiyahan na pagbulos kan makusog na uran tolos man na pig-ibakwar an mga estudyante.
Sigun pa ki Sebello, kadakol na mga magurang an nagsundo sa mga aki nin huli ta panundunan kan saindang lado na enkaso mayo an mga ini an mga aki an matinir sa laog kan eskwelahan sa salbadong lugar.
Dugang pa kan Principal, nag-abot sa 3-4 feet an langkaw kan tubig kun saen kun ikukumparar soboot sa mga nakalihis na pagbaha mas marekas ngunyan an pagtaas kan tubig.
Mientrastanto, pigsaysay man ni Sebello, na an nasa P4.9-M na flod mitigation structure sa Julian Meliton Elementary School an dae man ninda namatean o mayo man pagbabago sa nagyayaring pagbaha maski sinasabi na nakumpleto ini kan nakalihis na July 12, 2024.
Paliwang kan opisyal na enkaso nagagamit an struktura na ini, dae soboot labi-labi an pagbabaha kun kaya pigtutubudan na posibleng nasa luwas ini asin mayo mismo sa laog kan saindang eskwelahan.
Apwera digde, sa ginibong assessment kan mga esksperto, nagtitinir na an problema sa basura an saro sa mga nakaka-kontribwer sa dakulang angat pag-abot sa pagbaha.
Kun dae kaya mantinido an kalinigan mabalik ini sa tawo sa panahon kan kalamidad maski pa an pag-uran sana.
Sa ngunyan, kamawotan na sana kaini na masimbagan an nasambitan ng problema para sa kasalbaduhan kan saindang mga estudyante.
