Dae tinutugutan kan UAAP management committee an kahurutan kan pamayuhan kan PBA na tugutan an mga UAAP players na makapagpartisipar sa PBA Rookie Draft antes pa man magpuon an season.
Mawot kuta kan PBA na matugutan kan UAAP an mga student-athletes players tanganing makapagsumiter nin aplikasyon para sa isasagibong Rookie Draft sa Setyembre 7.
Mapuon an UAAP Season 88 sa Setyembre 19 sa University of Santo Tomas grandstand sa España, Manila.
Alagad pigpahayag ni UAAP executive director Atty. Rebo Saguisag na sa ngunyan, paramientras na dae tutugutan kan liga.
Mawot ni Saguisag na pag-adalan ini nin marhay bako sana sa basketball kundi magin sa iba pang sports siring kan volleyball na igwa naman professional league sa ngaran kan Premier Volleyball League.
Dae nagtao nin marekas na aksyon an UAAP tanganing mayong magin aberya sa nakatalaan na pagbubukas kan bagong season kan liga.
