Nagbabala an Koronadal City Health Office (CHO) sa publiko kontra sa pagkakan kan mga alay sa mga puntod ngunyan na Undas huli sa dakulang peligro kaini sa salud.
Segun ki Koronadal City Health Officer Dr. Vincent Ende, dai na ligtas kakanon an mga alay na ini huli ta nabilad na sa aire, alpog, mga insekto, asin manlaen-laen na mikrobyo
An mga pagkakan na haloy nang nakabuyangyang asin mayong taklob madaling makontaminar, na pwedeng magkawsa nin kulog tulak, pagsuka, pagpurit, asin “food poisoning.”
Huli kaini, mahigot na ipinagbabawal an pagkakan kan mga alay sa nagadan; imbes, pinapayo sa mga bisita na magdara na sana nin sadiri nindang pagkaon na inandam sa malinig asin ligtas na paagi.
Pinagiromdom man kan CHO an publiko na magdara nin supisyenteng inumon na tubig tanganing malikayan an dehydration, siring man an paggamit nin payong o sombrero kontra sa makusog na init kan saldang.
Idinugang pa kan ahensya na dapat seguraduhon kan mga may maintenance medication na dara ninda an saindang mga bulong tanganing mapagdanay na ligtas asin marhay an salud kan bilog na pamilya mantang nagdadalaw sa mga mahal sa buhay.
