NAGA CITY- Tinawan-duon kan kampo ni dating Senadora Leila de Lima na an kakulangan nin ebidensya an kawsa kun tano kinatigan kan korte an motion for demurrer to evidence na saindang pigsunad. Partikulamente an mosyon na pigsunad ninda sa Muntinlupa Regional Trial Court branch 206 kan March 20.
Sigun ki Atty. Boni Tacardon, abogado ni De Lima, dae nagtrayumpo an prosekusyon na mapatotoohang guilty an dating senadora sa sinasabing Bilibid drug trading.
Enot nang nabasura an duwang drug cases ni De Lima. Boot sana sabihon kaini, dagusang nang nalining an dating senadora sa saiyang mga kaso na igwa nin kinaaraman sa iligal na droga.
