Nagpahayag nin pagkahandal an kampo ni dating House Speaker Ferdinand Martin Romualdez asin pagkabigla sa desisyon kan Sandiganbayan na haleon si dating Department of Public Works and Highways (DPWH) Secretary Manuel Bonoan sa kaso nin plunder related sa soboot anomalya sa flood control projects.
Segun kay Atty. Ade Fajardo, an legal counsel asin tagapagtaram ni Romualdez, mayo pang pahayag hale ki Bonoan o siisay man na inhenyero o opisyal kan DPWH na nagkokonektar ki Romualdez sa mga iregularidad sa mga proyekto sa pagkontrol kan baha.
Sinabi ni Fajardo na nakakahadit an paghale ki Bonoan sa kasong plunder and graft na saiyang inaatubang kaiba an iba pang mga akusado, kabale na si Sen. Jinggoy Estrada.
Sinabi niya na puon kan magkondusir nin preliminaryong imbestigasyon an special panel kan Ombudsman kontra ki Romualdez, mayo pang alegasyon gikan sa arin man na opisyal kan DPWH na nagkokonektar sa dating Speaker sa anomaliya.
Mayo man nin nabisto na partikular na proyekto kan DPWH kun saen nakialam o naggamit nin impluwensya si Romualdez tanganing paboran an sarong kontratista.
Huli kaini, sinabi ni Fajardo na nakakalibog kun tano ta puwede nang magin testigo si Bonoan makalihis na haleon bilang akusado sa kaso.
Mientrastanto, nanindugan si Fajardo na mayo nang “credible evidence” laban ki Romualdez makalihis na binawi kan limang pig-aapod na “Maleta Boys,” kaiba an key witness na si Orly Guteza, an saindang mga alegasyon kontra sa dating Speaker.
Sinabi man kaini na suportado ini kan mga pahayag kan 25 pang mga testigo na nagkwestyon sa mga naenot na alegasyon kan 18 “Maleta Boys.”
