Ipigheras ni Atty. Jimmy Bondoc, legal counsel ni Sen. Ronald “Bato” dela Rosa, na obheto ninda na maibitaran an anuman na sitwasyon na posibleng magresulta sa kaparehong kapaladan ni dating Presidente Rodrigo Duterte makalihis na siya arestaron asin kustodiyahon kan International Criminal Court (ICC).
Sigon ki Bondoc, minimidbid kan saindang kampo an pag-eksister kan mandamiento de aresto kan ICC kontra ki Dela Rosa, alagad nanindugan ini na bako ining “enforceable” sa Pilipinas sagkod na dai pa ini nag-aagi sa tamang proseso.
Segun sa saiya, an rason kun nata isinairarom kan Senado si Dela Rosa sa protective custody iyo na maibitaran an tulos na pag-utob kan mandamiento.
Tinawang-duon man ni Bondoc na mawot nindang maibitaran an posibilidad na madakop asin ipadara sa ibang nasyon an senador, arog kan nangyari ki dating Presidente Rodrigo Duterte kan Marso 11, 2025, kan siya arestaron sa Ninoy Aquino International Airport (NAIA) asin kan huri dinara sa The Hague, Netherlands.
Nagpatanid man si Bondoc na enkaso mapiritan na iserbe an warrant, posibleng mayo nang legal na paagi tanganing maibalik sa nasyon si Dela Rosa enkaso pabor sa sainda an desisyon kan Korte Suprema.
