NAGA CITY-Pinapahemotikan kan mga kaparyentes kan drug suspect na nagadan sa Buy-Bust Operation sa Zone-5, Barangay Balatas, syudad nin Naga kasuhapon.
Sa entrevista kan Bombo Radyo Naga ki Katherine Alemania, tiyaon kan suspek na si Bon Ryan Talagtag, sinaysay kaini na nasirip niyang gayo sa labot kan lanob sa pag-ultanan kan saiyang harong asin residensya kan suspek na pamangkin na nakadapa asin pigpipirit kan sarong police officer na kaputan an pigbubusul kaining kalibre 35 badil bago pagbabadilon.
Sigun siya, pinapakapot an suspek ni8n badil tanganing mapaluwas na nanlaban ini.
Dati na suboot nagsuko sa mga otoridad si Bon asin dae na nag-gagamit nin iligal na droga.
Sa suhay na entrevista ki Jacqueline Talagtag, tugang kan suspek, sinaysay kaini na may kakundian na sa isip si Bon Ryan makalihis sanang mag-untok sa pag-gamit nin pinapangalad na bolong.
Sigun saiya, pigkakawatan kan nagkapirang residentes kan lugar an tugang sa paagi nin pagsugo-sugo.
Dae pig-gigilid ni Jacqueline an posibilidad na ginibong bentahe kan mga operatiba an kakundian kan suspek tanganing mapakapotan an nasambitan nang armas tanganing mapaluwas na nanlaban ini.
Sa ibong na lado, enot nang sinaysay ni SPO2 Tobby Bongon, tagapagtaram kan Naga City Police Office (NCPO) na pigtutukan kan suspek an poseur buyer kaya dae na nagduwa-duwa an mga otoridad na pagbabadilon ini hasta sa mabawian nin buhay.
Mientrastanto kinumpirmar kan sarong residente kan Sona Singko, Barangay Balatas, syudad nin Naga na may kakundian sa pag-iisip an suspek na si Bon Ryan Talagtag makalihis na mag-untok na mag-gamit nin iligal na droga.
Sa entrevista kan Bombo Radyo Naga sa dae na pigngaranang residente, sinaysay kaini na mayo sa sadiri an suspek pag-nagluluwas ini sa saiyang residensya.
Sigun saiya, nahihiling kun minsan si Bon na naglalakaw-lakaw na mayong sulot na tsinelas.
Pigtawan doon kan residente na maboot an suspek kaya dae siya makatubod na nanlaban ini.
