NAGA CITY – Nagtitinir na hababa an naiirehistrong teenage pregnancy sa Barangay San Ramon, Iriga City.
Sa entrevista kan Bombo Radyo Naga ki Bea Peralta, SK secretary sa lugar, sinaysay kan mga ini na quarterly nagsasagibo an saindang mga barangay health workers nin seminar dapit sa teenage pregnancy na nakakatabang tanganing maedukar an mga jovenes sa mga adbentahe asin disadbentahe kan amay na pagbabados.
Dugang pa ni Peralta na saro pa sa mga rason kan pagkuriyat kaini an kawaran nin kaaraman dapit sa amay na pagbabados, kawaran nin tamang kaaraman sa paggamit nin mga contraceptives huli naman sa kapagtiosan.
Kadakol kaya na mga jovenes an mayong access sa tamang impormasyon o kaaraman dapit sa mga rason kun tanu pigpopromote an tamang family planning tanganing malikayan an amay na pagbabados asin pagdakula kan numero kan pamilya.
Apwera pa digdi, dapat man soboot na magpuon an pag-edukar sa mga aki sa saindang mga magurang.
Kun sain, sinda an dapat na enot na magpaliwanag asin magtukdo sa saindang mga aki kan mga bagay na dapat nindang gibuhon tanganing malikayan an amay na pagbabados.
Sa ngunyan, nagbibilog naman an mga ini nin mga kaplanuhan kun paano matatabangan an mga batang ina sa saindang lugar, siring na sana kan pagtatao nin mga livelihood program na pupwede nindang pagkakitaan.
Dugang pa digdi an pagtatao man nin mga seedlings na pupwede nindang itanom asin ipabakal na makakatabang man sa saindang pangkabuhayan.
