Dumating sa Estados Unidos sina King Charles at Queen Camilla para sa apat na araw na state visit, na sinalubong ni US President Donald Trump sa gitna ng mga isyu sa ugnayan ng Amerika at United Kingdom.
Sinalubong nina Trump at First Lady Melania Trump ang royal couple sa White House matapos ang kanilang pagdating sa Joint Base Andrews, kung saan naganap ang maikling arrival ceremony. Nagpalitan ng pagbati at larawan ang dalawang lider at kanilang mga asawa bago nagtungo sa isang pribadong tea meeting.
Ang pagbisita ay itinuturing na isa sa pinakamahalagang state visit sa panahon ni King Charles, kasabay ng paggunita sa ika-250 anibersaryo ng US Declaration of Independence mula sa Britain.
Sa mga susunod na araw, nakatakdang magtalumpati si King Charles sa US Congress, dumalo sa marangyang state dinner sa White House, at bumisita sa New York City at Virginia bilang bahagi ng kanyang official schedule.
Ayon sa Palace sources, ang talumpati ng hari ay tatagal ng humigit-kumulang 20 minuto at magbibigay-diin sa matagal nang ugnayan ng US at UK bilang “isa sa pinakamalakas na alyansa sa kasaysayan.”
Gayunman, nangyayari ang pagbisita sa gitna ng tensyon sa pagitan ng dalawang bansa kaugnay ng US-Israel war sa Iran, kung saan nagkaroon ng hindi pagkakasundo sa posisyon ng British government.
Ayon sa ulat, umaasa si UK Prime Minister Keir Starmer na mapapalakas ng pagbisita ang “special relationship” ng dalawang bansa, na sinasabing nasa pinakamahina nitong antas mula pa noong Suez Crisis noong 1956.
Kasama rin sa iskedyul ang paggunita sa mga biktima ng September 11 attacks sa New York, at pagbisita sa mga proyekto sa konserbasyon sa Virginia.
Samantala, iniwasan ng royal visit ang kontrobersiya kaugnay ng Jeffrey Epstein scandal na kinasasangkutan ng kapatid ni King Charles na si Andrew Mountbatten-Windsor, na patuloy na iniimbestigahan ng mga awtoridad.
