NAGA CITY- Nagpakol sa kabilugang 2,287 sites sa Bicol Region an nagtatangro nin libreng internet access sa irarom kan Department of Information and Communications Technology’s (DICT) Free Wi-Fi for All program.
Sigun ki DICT-5 Director Rachel Ann Grabador, an mga tawo sa presente naoogma sa libreng internet access sa mga pampublikong lugar sa bilog na Rehiyon.
Katakod digde, an sites an bako sanang limitado sa national asin local government offices, alagad makukua man sa basic education institutions, hospitals, health centers, rural health units, parks, plazas, libraries, barangay reading centers, airports, seaports, asin transport terminals.
An inisyatiba ini kan DICT an nakalinya sa Geographically Isolated and Disadvantaged Areas (GIDAs) sa Bicol tanganing magserbeng tulay tanganing maikonektar an manlaen-laen na hararayong barangay sa Rehiyong Bicol.
Pigsaysay pa kan opisyal na sa paagi kan libreng internet an komunidad marekas na makaka-access sa importanteng online services sa edukasyon, salud, disaster response, asin local governance.
An lakdang na ini an parte kan pagpapahewas kan gobierno sa saindang paglalapigot para sa digitalisasyon sa bilog na nasyon.
Mientrastanto, an DICT-5 naggagamit nin wireless technologies, partikularment an Low Earth Orbit (LEO) satellite technology tanganing makapagtao nin marekas na internet access sa hararayong lugar.
Sa presenteng taon, nasa 300 na aktibong free Wi-Fi hotspots sa Rehiyon an pigpapagana kan LEO satellite connections.
