Pigreport kan Philippine Red Cross (PRC) na nagpakol sa 856 pasyente an saindang naalalayan puon Enero 8 hasta Enero 10, sa pagselebrar kan Feast of the Nazarene.
Sa numerong ini, 415 indibidwal an nagsairarom sa vital signs monitoring, 409 an may minor cases siring kan pagkahilo, lugad, abrasion, sprain, paso, asin kalintura, mantang 13 an major cases kaibahan an hararom na lugad, sakit sa paghangos, asin fracture.
Gikan sa kabilogang pasyente, 19 an kinaipuhan darahon sa manlaen-laen na ospital siring kan PGH, Philippine Orthopedic, Tondo Medical, Quirino Memorial, Jose Reyes, Valenzuela Medical Center, Ospital ng Maynila, East Avenue, Fabella, asin San Lazaro.
Nagtao an PRC nin 2,204 welfare assistance, kaibahan an pyschosocial first aid sa 83 katawo, tracing sa 6, referral sa 38, free calls sa 2, asin pagheheras nin 2,075 food packs. Sa saindang Emergency Field Hospital, 44 pasyente an naasikaso, kun saen 34 an minor cases asin 10 an nailipat sa ibang ospital.
Sa tubig asin sanitasyon, nakapag-distribute an PRC nin 1,300 litro kan inumong tubig asin 10,000 litro kan domestic water, na nakapagserbe sa 2,950 indibidwal.
Para sa operasyon, nag-deploy an PRC nin 1 command post, 17 first aid stations, 27 welfare desks, 10 foot patrols, 1 emergency field hospital, 19 ambulansya, 3 service vehicles, 9 medic on wheels, 1 water tanker, 3 rescue boats, asin 1 Humvee, na suportado kan 1,260 staff asin volunteers.
An mahewas na aksyon kan PRC patunay kan saindang kapreparaduhan asin dedikasyon sa pagtatao nin tabang asin kasalbaduhan sa milyun-milyong debotong nag-atendir sa Traslacion 2026.
