Preparado soboot si Senate Presidente Tempore Ping Lacson na magtao nin personal na abiso ki Senator Ronald “Bato” dela Rosa katakod kan posibleng warrant of arrest gikan sa International Criminal Court kontra sa senador.
Sigun ki Lacson, inapudan kaini si dela Rosa tolong aldaw an nakaligis tanganing magtao nin moral support komo dating kaibahan sa Philippine National Police (PNP), alagad dae ini nagsimbag sa saiyang apod.
Kinaagahan, mismong si dela Rosa an nag-apod pabweltada, alagad dae na man ini nasimbag ni Lacson.
Hurot ni Lacson, hagad sana kaining makaulay si dela Rosa tanganing makapagtao nin abiso – dae para magtago, kundi tanganing maaraman kun pano hahampangon an mga kasong pigkakahampang kaini sa tamang panahon.
Dugang pa kaini, mas kumplikado an sitwason ngunyan para sa senador huli ta an kaso an nasa International Criminal Court, bako sana sa lokal na korte siring kan saiyang kaso asin kan iba pang senador.
Kan mahapot man si Lacson kun tutukduan ba kaini si dela Rosa kun pano magtago.
Suba kaini, kun makapagdesisyon na soboot si dela Rosa na magtago, tutukduan kaini ini na magtago sabay linaw na nasa kamot kan mga otoridad an pag-arestar sa senador.
Ipinaliwanag man ni Lacson an limitasyon kan parliamentary immunity enkaso magporbar na magtinir si dela Rosa sa Senado tanganing malikayan an pag-arestar.
Siring man, sinaysay kan senador na susuportaram kan mayorya kan senador an pahayag ni Senate President Tito Sotto na dapat igalang an kortesiya na dae basta isagibo an pag-arestar sa laog kan senado.
Mientrastanto, naghagad na si Senate President Vicente Sotto III nin legal na opinyon dapit sa nararapat na lakdang kan Senador enkaso madagos an report kan posibleng ipaaarestar kan International Criminal Court (ICC) si dela Rosa.
Sigun ki Sotto, mayo pa ining kumpirmadong impormasyon kun igwang warrant of arrest kontra ki dela Rosa asin hasta ngunyan, dae pa kaini nakakaulay an senador.
Mas pinili kaining maghagad nin abiso sa mga eksperto kaysa magtao nin sadiring opinyon, huli ta kun magtaram ini nin direkta, madalas nagkakaigwa nin salang interpretasyon asin batikos.
Dati na mang sinaysay ni Sotto na dae tutugotan kan Senado an pag-arestar ki dela Rosa o sa maski sisay na senador mantang nasa laog kan Senado, orog na sa panahon kan sesyon.
Bako soboot ining pagdepensar ki Dela Rosa kundi pagtataong importansiya sa Senado komo institusyon.
