Kinumpirma kan International Criminal Court (ICC) na nagpaluwas na ini nin mandamiento de aresto laban ki Senador Ronald “Bato” dela Rosa katakod kan suboot mga panggagadan sa irarom kan war on drugs campaign kan administrasyon ni dating Presidente Rodrigo Duterte.
Base sa 16-pahinang dokumento kan ICC, an arrest warrant “classified as secret” alagad pwedeng ihiras sa mga estado, internasyonal na organisasyon, asin iba pang awtorisadong personalidad.
Kan Lunes, sinabi ni dating senador Antonio Trillanes IV na ipinadara na sa Philippine Center on Transnational Crime an kopya kan warrant.
Segun sa tagapagtaram kan ICC na si Orianne Maillet, kinumpirmar kan tribunal na lehitimo an dokumento kan ICC na nagluwas sa warrant na nagkukuiryat sa media.
“This arrest warrant against Mr. Ronald Marapon Dela Rosa was issued confidentially, under seal, by Pre-Trial Chamber I of the ICC on 6 November 2025,” segun kay Maillet.
Sinabi pa sa warrant na igwa nin “reasonable grounds” na magtubod na si dela Rosa nagkomiter nin mga krimen kontra sa katawohan na murder puon kan Hulyo 3, 2016 sagkod sa katapusan kan Abril 2018.
Segun sa dokumento, dai mababa sa 32 katawo an soboot ginadan sa manlaen-laen na parte kan nasyon kan mga miembros kan ley, kabali an nagkapirang soboot mga paragadan asin mga pagsadiri na bakong pulis, sa panahon kan pinakahalangkaw na kampanya kontra droga.
Si Dela Rosa iyo an pinakaenot na hepe kan Philippine National Police sa irarom kan administrasyon ni Duterte asin saro sa mayor na nag-iimplementar kan kampanya sa war on drugs.
Sinabi kan piskalya kan ICC na kinakaipuhan an tulos na pag-arestar ki dela Rosa tanganing maseguro an saiyang pag-atubang sa korte.
Sinambit man kan korte an sarong report na si dela Rosa soboot naggibo nin mga pananakot laban sa sarong imbestigador kan ICC asin inapod na “mga traydor” an mga nakikipagtabangan sa imbestigasyon.
Huli kaini, sinabi kan ICC na kinakaipuhan an pag-arestar tanganing maibitaran an posibleng pakikiaram sa imbestigasyon asin tanganing maprotehiran an mga testigo asin biktima.
Mientrastanto, pigprobaran kan mga operatiba kan National Bureau of Investigation na iserbe an mandamiento de aresto ki dela Rosa mantang yaon sa senado, alagad dae ini nagibo huli sa constitutional provision na pig-iimplementar kan Upper House of Congress.
