Aram baya nindo mga ka-bombo, sarong Chinese na lalaki an nagsapo nin fungal lung infection huli sa ugali kaini na pagparong sa maating medyas.
Susog sa report, an dae na pinangaranan na lalaki an sarong middle-aged office worker gikan sa Chonqing an kasuarin sana pigdara sa Southwest Hospital kan Army Medical University huli sa dagos-dagos asin mayong untok na pag-abo.
Pigsaysay kan lalaki sa saiyang doktor na dae soboot nag-uuntok an saiyang abo maski pa nag-iinom man ini nin syrup.
Nagin kulay dugo naman an saiyang mga mata na nagin rason tanganing maghagad na ini nin medikal na asistensiya.
Makalihis na magkundusir nin CT asin MRI examinations, nakahiling an mga doktor nin kahina-hinala na anino sa saiyang ibabang toong baga na nagpapahiling na igwa ining fungal lung disease huli sa Aspergillus infection.
Kan haputon kan mga doktor an lalaki sa posibleng kawsa kan impeksyon digde na kan mga ini napag-araman na igwa palan ugali an lalaki na magparong nin maating medyas.
Sa ngunyan, katakod kan insidente liwat na nagpagirumdom an mga doktor na bakong marhay sa salud kan sarong tawo an pagparong kan anuman na maati o mabatang bagay pwede soboot ining magkawsa nin impeksyon o iba pang malalang helang.
