Sinentensyahan si dating Presidente kan Kosovo na si Hashim Thaci kan International Criminal Court (ICC) nin 25 taon na pagkakakulong.
Ini matapos na mapatunayan siyang guilty sa kasong war crimes.
Sa naganap na pagdangog, nahatulan an 58-anyos huli sa mga krimen na nangyari durante kan independence war kan Kosovo kontra sa Serbia kan 1990s.
Sa nasabing giyera, labi sa 10,000 katawo an nagadan.
Nailuwas an sentensya matapos an tulong taon na pagdangog sa mga kaso na kabali an murder, illegal arrests, torture, asin cruel treatment.
Kaiba man an nagkapirang alegasyon laban saiya na dai pa napapatunayan.
Si Thaci sarong co-founder asin commander kan Kosovo Liberation Army (KLA), an grupo na naglaban para sa katalingkasan asin pigkokonsiderar na bayani sa Kosovo.
Inakusahan siya nin paggadan sa haros 100 katawo asin an pagkawara kan nagkapirang indibidwal.
Kaiba niya man na nahatulan an tulong dating commander kan KLA.
An Kosovo Liberation Army (KLA) itinindog kan 1990 bilang sarong militanteng grupo kan mga ethnic Albanian sa dating probinsya kan Serbia, sa tahaw kan nagaganap na giyera sa rehiyon.
Si Thaci an nagin pinakaenot na Prime Minister kan Kosovo kan magdeklara sinda nin katalingkasan kan 2008, asin nagin man presidente, alagad naghali sa pwesto kan 2020 tanganing atubangon an kaso sa The Hague.
