NAGA CITY-Pigsierto kan Department of Labor and Employment na bastante an saindang iaaalok na trabaho para sa mga Pilipinong obrero duwang aldaw antes an Araw ng Kalayaan.
Ini kasabay kan padagos na pagpepreparar para igdi kan ahensya, kun saen kada rehiyon pinagsugo na magsagibo nin mga job fair para sa mga Pilipinong obrero na mawot makakua nin disenteng trabaho.
Sa presente nag-abot na sa 106,298 an kumpirmadong bakanteng lokal na trabaho na pwedeng applyan kan mga obrero.
Igwa man nin 1,000 employers gikan overseas na nangangaipo nin 5,165 na magigin Overseas Filipino Workers.
Sigun ki Labor Secretary Bienvenido Laguesma, siertong orog pa ining madudugangan mantang paparani an Araw ng Kalayaan, kun suarin isasabay an job fair.
Kabali sa mga top vacancies an production worker/operator, customer service representative, cashier, bagger, sales clerk, mga laborer, karpintero, service crew, cook, waiter, asin iba pa.
Pigpayuhan man kan sekretaryo an mga mawot na mag-apply na magpreparar nin dakul na application letters asin mga kakaipuhanong requirements siring kan diploma, transcript of records, government clearances, certificate of employment, asin iba pa.
