Naraot an labi sa P1.4 billion na kantidad nin mga produktong agrikultural sa probinsya kan Cagayan huli sa sunod-sunod na panlalamasa kan mga makusog na bagyo.
Sigun ki Cagayan Governor Manuel Mamba, piglalaoman na madugangan pa an kantidad na ini huli sa final landfall kan supertyphoon Ofel kasuodma asin huma kan bagyong Pepito.
Kabale sa mayor na apektado iyo an mga paroy, mais, asin iba pang industriya. Sigon ki Mamba, dagos-dagos an ginigibong assessment sa danyos na iwinalat kan magkasunod na bagyo, alagad nagigin dipisil na ini huli sa haros daing ontok na pag-uran, asin pirang aldaw sana an pag-ultanan kan mga siring na bagyo.
Base sa rekord kan probinsya, poon 70 sagkod 80% kan total na populasyon kan Cagayan gabos paraoma asin parasira.
An probinsyang ini nagseserbi man komo saro sa pinakadakulang prodyuser nin paroy, mais, asin iba-ibang halangkaw an kantidad na komersyal na pananom sa bilog na nasyon.
