NAGA CITY- Ipigkundusir an Launching kan “Walang Gutom 2027 Food Stamp Program” sa banwaan nin Calabanga Camarines Sur.
Sa entrevista kan Bombo Radyo Naga ki Adonis Aguillar Jr., Municipal Councilor- LGU-Calabanga, Camaries Sur, pigsaysay kaini na nagpakol sa labi 970 an nabenepisyaran kan nasambitan ng programa na nagkakantidad nin P3,000 gikan sa National Government asin Local Government.
An programa man na ini an mapadagos hasta sa taong 2027, boot sabihon kaini na kada bulan, makakaresiber nin P3,000 na kantidad kan Go, Grow asin Glow foods na gikan sa saindang mga katuwang na retailer kan banwaan.
Mientrastanto, an mga benepisyaro man digdi an dae kabali sa Pantawid Pamilyang Pilipino Program (4Ps) alagad nakalista sa Listahanan Program.
Basado man soboot sa gobierno, mas marhay na pagkakan an ipanao sa mga nangangaipohan tanganing masierto na an padudumanan kaini an para sa ikakamarhay kan mga benepisyaryo.
Katakod kaini, nangapodan man an konsehal sa mga benepisyaryo na dae pag-covert sa kwarta an mga pagkakan na gikan sa programa o dae ini ipabakal.
Enkaso kaya soboot naaraman kan Municipal Social Welfare and Development Office an siring na salang gibuhon, awtomatiko sindang hahalion sa listahan.
