Ipinaliwanag kan Legal Expert an mga sitwasyon kun saen an ley nagtutugot para sa pag-arestar sa mga namamanwaan o an pag-arestar sa sarong pribadong indibidwal.
Sa entrevista kan Bombo Radyo Naga ki Atty. Abelardo C. Quilaton Jr. – Legal Expert, sinabi kaini na pwedeng gibuhon ini sa mga partikular na sirkumstansya, kabali na an in flagrante delicto, hot pursuit, asin an pagdakop sa nakadulag na preso, susog sa Rule 113 kan Rules of Criminal Procedure.
Tinawang-duon kaini na bakong igo an simpleng suspetsa o tsismis tanganing isagibo an warrantless arrest. Kaipuhan na igwa nin malinaw na legal na basehan asin personal na kaaraman sa mga kamugtakan.
Nag-abiso man ini na kun pwede mag-apod tulos sa pulis asin likayan an paggamit nin labing pwersa. An pag-arestar sa mga namamanwaan dai dapat gamiton bilang paagi nin padusa, pagbalos, o pagpapababa sa publiko.
Idinugang ni Quilaton na an pag-arestar sa mga namamanwaan dapat na ibilang na huring praktikal na opsyon. Mas maray suboot na maging responsableng witness, preserbaron an mga ebidensya, asin ipasa sa mga awtoridad an sitwasyon.
