Nagpaluwas nin anunsyo an lokal na gobyerno kan Cotabato City manungod sa iskedyul kan klase asin trabaho para sa mga estudyante asin empleyado poon Setyembre 15 sagkod Setyembre 18, bilang parte kan mga pag-iingat na lakdang sa siyudad.
Katuyuhan kan panuntunan na matawan nin dalan an masusing imbestigasyon kan mga awtoridad kasunod kan mga nairehistrong insidente nin karahasan sa pinakaenot na Bangsamoro Parliamentary Elections.
Sa parte kan gobyerno kan siyudad, ipapautob an work-from-home arrangement para sa mga empleyado kaini sa nasambit na mga petsa, apwera sa mga nakatoka sa essential, health, emergency, disaster response, security, peace and order, asin mga basic frontline service.
Suspendido man an in-person classes asin nakatakdang eksaminasyon sa gabos na lebel sa pampubliko asin pribadong eskwelahan, alagad pinagpapayuhan an mga pasilidad na magpatupad nin asynchronous learning.
Mantang, ipinagkakatiwala na sa pamamahala kan mga pribadong kumpanya asin opisina an pagdesisyon sa iskedyul kan trabaho kan saindang mga empleyado sa laog kan apat na aldaw.
Pinagpapayuhan kan City LGU an mga residente kan Cotabato City na magdanay na kalmado, magin maingat, asin magpokus sana sa mga beripikadong bareta asin opisyal na anunsyo kan gobyerno.
