NAGA CITY – Pigtagamahan nin dugang na P1-M na pondo kan lokal na gobierno kan Goa, Camarines Sur an Municipal Nutrition Office kan saindang banwaan para sa supplementary feeding kan mga kaakian sa lugar.
Sa entrevista kan Bombo Radyo Naga ki Joy Raizza Ramos, Municipal Nutritional Action Officer-Goa, sinaysay kaini na pupuonan na kan saindang opisina an saindang milk feeding activity sa maabot na Hulyo 23 para sa mga aki na 36-59 months.
Apwera pa digdi, igwa pa sinda nin hot meals na pigtagamahan man nin budget na P250-K. Dugang pa ni Ramos, magkakaigwa naman an saindang banwaan nin Nutri bun facility, kun sain sinda na mismo an magibo nin mga tinapay para sa mga residentes.
Nasa 400 na mga kaakian man an nakabali sa listahan kan ahensya kaibahan na an 61 na nutritionaly at risk pregnant women. Gikan man sa nasambitan ng numero nagpili sana sinda nin top 8 na mga aki na igwa nin halangkaw na prevalence kan underweight asin stunted. An mga ini soboot an saindang pig-enot huli ta sinda an mas nangangaipuhan nin intervention.
Sigun pa ki Ramos, igwa naman nin mga kaakian na nagmarhay naman an kamugtakan asin nahali na sa pagigin malnourished sa tabang kan saindang mga pigsasagibong mga programa.
Pag-abot man sa mga programa para sa mga nutritionaly at risk pregnant women o mga hababa an body mass index asin mga teenage mom an makakaresibe man nin gatas gikan sa ahensya.
Tangani man na malikayan an pauru-utrong pagbabados kan mga kabataan nagkokondusir sinda nin counseling para sa mga adolescent, kun sain kabali sa saindang mga pinag-uulayan an family planning asin an importansya kaini.
