NAGA CITY – Naglusar nin mga panibagong programa an lokal na gobierno kan Naga tanganing mas orog na makaenganyar nin mga turista na magbisita sa syudad.
An nasambitan ng lakdang an kasunod kan pagigin numero uno kaini sa Bicol Region asin ika-7 naman sa bilog na nasyon komo Most Popular Tourist Destinations in 2023.
Sa nagin paghampang sa mga kagawad kan media ni Naga City Mayor Nelson Legacion, sinaysay kaini na sa presente pig-eenkaminar ninda an mga dating taga Naga na nakaistar na sa ibang lugar na magbisita sa syudad.
Saro pa digdi an pag-enkaminar sa manlaen-laeng organisasyon asin asosyon sa Bicol Region o sa nasyunal basta kayang maakomodar. Apwera pa digdi, igwa pa sinda nin pigbibilog na duwa pang tourism related projects na makakatabang baku sanang locally kundi magin nationally.
Pig-urgulyo man kan alkalde na igwa nin magayon na lugar sa Panicuason na kaipuhan sana na madevelop tanganing magin tourist destination.
Naglalaom man si Legacion na maiipadagos kan masunod na alkalde kan syudad an saiyang mga napuonan nang programa asin proyekto, preparado man soboot ini na magtao nin tabang pag-abot sa paghanap nin pondo para sa mga ini.
