NAGA CITY- Dawa pig-untok na an retrieval operation sa landslide area sa Barangay Patitinan, Sagñay, Camarines Sur naglalaom pa man giraray an mga otoridad na igwang makukuang bangkay sa lugar.
Ini makalihis na madukayan an bangkay kan mag-ina na kaibanan sa mga natabunan kan nagrasay na daga kan bulan nin Disyembre, 2018.
Sa entrevista kan Bombo Radyo Naga ki Marjun San Felipe, municipal administrator kan LGU-Sagñay, sinaysay kaining nakaandam pa nanggad an lokal na gobyerno enkaso igwang mga marekober pang bangkay sa lugar.
Sa ngunyan, nagpakol na sa 34 bangkay an narekober sa landslide area mantang 12 pa an padagos na nawawara.
Enot nang sinaysay ni Office of the Civil Defence (OCD)-Regional Director Claudio Yucot na dae na ninda ipapadagos an retrieval operaton huli ta delikado an lugar para sa retrieval team katakod kan posibilidad na liwat na magrasay an daga sa lugar.
