Maheras an National Housing Authority (NHA) nin libreng permanenteng paharong asin cash assistance sa mga pamilyang nawaran nin istaran makalihis an magnitude 6.9 na linog sa Bogo City asin karatig-bayan sa Cebu kan nakalihis na Setyembre 30.
Sigun ki NHA General Manager Joeben Tai, nagpepreparar na sinda nin relocation plan para sa labi sa 2,000 pamilya gikan sa Bogo asin man San Remigio, na ibabalyo sa salbado na lugar na harayo sa sentro kan linog.
Sigun ki Tai, habo na mag bweltada an mga ini sa dati huli sa uru-aldaw na aftershock.
Kada pamilya an tatawan nin row house na may duwang kuwarto sa 40-square meter lot, na may kaibahan na eskwelahan, covered court, asin man iba pang pasilidad sa komunidad. Libre ini huli ta biktima sinda kan kalamidad.
Mapuon man sa Biyernes an pagheheras nin ₱10,000 para sa bahagyang naraot asin man ₱30,000 para sa dagusang naraot na harong.
Magkakaigwa man nin sarong-bulang moratorium sa pagbabayad kan amortization para sa mga presenteng benepisyaryo sa Cebu asin Masbate, kaya mayong bayad sa Oktubre. Mantang isinasapinal an relocation plans, paramientras na nagtitinir an mga apektadong pamilya sa tent city na pigtugdok para sa poco mas o menos 2,500 pamilya.
