Nakadepende soboot sa pagluluwas kan desisyon kan Korte Suprema an liwat na paglutang ni Senator Bato Dela Rosa katakod sa pigsunad nindang petisyon kontra sa pakikipagtabangan kan gobyerno kan Pilipinas sa International Criminal Court (ICC).
Enot nang nagsunad nin petisyon an kampo kan senador sa Korte Suprema na nagkukuwestiyon sa nasambitan ng lakdang kan gobyerno tanganing arestaron an mga kaalyado kan dating Presidente Duterte.
Sigun ki Atty. Israelito Torreon, na iyong nagtitindog na abogado ninda Dela Rosa asin dating Presidente Rodrigo Duterte sa kaso, nagsunad na sinda nin manifestation sa SC dapit digde para sa pag-aksiyon sa petition for certiorari.
Dinepensaran man kan abogado an presenteng sitwasyon ni Dela Rosa orog na ta nangyari na soboot an siring sa dating Presidente Duterte na inarestar asin ipinadara sa ICC.
Katakod kaini, sinaysay ni Torreon na mayo pa sindang kopya kan pigsasabing arrest warrant asin bigo man sindang makahagad kaini.
Nagsayuma man an abogado na simbagon kun nasa Pilipinas pa man an senador.
Si Dela Rosa an dae na naglaog sa Senado puon kan mapabaretang igwang pigluwas na warrant of arrest an ICC kontra sa saiya katakod pa man sa warrant on drugs kan dating administrasyon.
