NAGA CITY- Posible suboot na mapaamay an lubong sa bangkay kan Ilongga Overseas Filipino Worker (OFW) na nadukayan na nakabugtak sa laog nin freezer sa Kuwait.
Ini an sinaysay ni PS/Insp. Gilbert Baldevarona, hepe kan PNP sa Sara, Iloilo sa entrevista kan Bombo Radyo Naga.
Sigon ki Baldevarona, pinag-iisipan suboot kan pamilya kan nagadan na OFW na si Joanna Demafeliz na sa maabot na Pebrero 26 o 27 gibuhon an lubong kaini, suway sa orihinal na plano na gibuhon ini sa Marso 3.
Ini huli suboot sa kondisyon kan bangkay ni Joana na sinasabing posibleng haros sarong taon na nakabugtak sa freezer antes nadiskobre kan mga otoridad sa Kuwait.
Sa ngonyan, sigon ki Baldevarona, nakadeploy na an mga pulis sa harong kan pamilya Demafeliz sa banwaan nin Sara para masierto an seguridad asin katuninongan digdi urog pa ta nilalaoman na igwang mga VIP asin nagkapirang mga representante kan ahensya kan gobyerno an mapasiring digdi para makidumamay sa pamilya.
Enot kaini, nagpaabot na kan saiyang pakikidumamay sa pamilya Demafeliz si Arnell Ignacio hale sa Overseas Workers Welfare Administration (OWWA.)
Mientrastanto, pigsierto man ni PS/Supt. Gilbert Gorero, tagapagtaram kan PNP Western Visayas, na nakaandam an saindang linyada para magtao nin mas mahigot na seguridad sa lugar sa oras na magpasiring digdi si presidente Rodrigo Duterte.
