NAGA CITY – Nagsapo nin minor injuries an tolo katao kaibanan na an duwang menor de edad makalihis mahagop kan tren kan Philippine National Railways (PNR) an sarong pampasaherong tricycle sa Mabolo, Naga City.
Sa entrevista kan Bombo Radyo Naga ki Eng. Jose Florece, Operation Manager kan PNR-Bicol, sinaysay kaini na pasiring kuta na sa banwaan kan Sipocot an Northbound train alagad pag-abot sa crossing kan nasambitan ng Barangay kan mahagop kaini an pampasaherong tricycle na minamaneho ni Edwin Francisco.
Sigon ki Florece, durudiretso man an ginibong pagbusina kan driver kan train na si Ian Beriña alagad pinirit pa soboot ni Francisco na maibalyo sa riles an tricycle na nagin rason para mahagop ini kan lunadan.
Katakod kaini, nagsapo nin lugad sa lawas an mag-iina na lunad kan nasambitan ng tricycle na tulos man na idinalagan sa Naga City Hospital. Sa ngunian, nangapudan na sana si Florece sa mga driver kan manlaen laen na lunadan na mag-ingat urog na kung oras na kan pag-agi kan mga pampasaherong train para malikayan na an mga arug kaining aksidente.
