Posibleng upos kan sigarilyo an nagin kawsa kan kasulo sa sarong storage area sa Barangay San Felipe, Naga City.
Sa intrevista kan Bombo Radyo Naga ki Senior Fire Officer Roy Vincent Dacudao Acero, kan Naga City Fire Station, sinaysay kaini na sa inisyal na imbestigasyon, pigkokonsidera na upos kan sigarliyo an nagkawsa kan kasulo huli sa dae tulos napaparong an upos kan sigarilyo makalihis na iapon sa lugar.
Marikas na nagresponde an mga bombero makalihis na makatanggap nin report alas 10:52 nin banggi gikan sa sarong concerned citizen.
Mayo nin nairido o nagadan sa insidente. An estraktura, na ginagamit bilang storage room asin pig-paarkila, iyo man an nasulo, mantang an kataid na parte ginagamit sa pag-sort nin mga komersyal na materyales.
Nagdesisyon an kagsadiri kan lote na gibahon an natatadang parte kan estraktura tanganing maiwasan an peligro sa komunidad.
Nangapudan an mga otoridad sa publiko, partikularmente sa mga parasigarilyo, na seguradohon na lubos nang napaparong an upos asin iapon ini sa tamang lalagan tanganing maibitaran an mga kasulo.
