NAGA CITY – Patay ang isang magsasaka habang sugatan naman ang kaniyang pamangkin matapos makuryente sa Mulanay, Quezon.
Kinilala ang namatay na biktima na si Edwin Pereyra, 45-anyos at ang sugatan na si Angelo Gacula, 21-anyos, kapwa residente ng nasabing bayan.
Sa nakalap na impormasyon ng Bombo Radyo Naga sa Quezon Police Provincial Office, napag-alaman na habang may bitbit na steel plow si Pereyra para mag-cultivate ng kaniyang sakahan, nang aksidente nitong mahawakan ang electric wire na nakalaylay sa naturang lugar.
Sa inisyal na imbestigasyon ng mga awtoridad, napag-alaman na sinubukan sanang tulungan ng kaniyang pamangkin ang biktima ngunit nagresulta lamang ito sa pagkakakuryente ng dalawa.
Dahil sa pangyayari, nagtamo ng sugat sa iba’t-ibang bahagi ng kanilang katawan ang mga biktima na agad namang dinala sa ospital para sa asistensiya medikal.
Ngunit sa kasamaang palad ay idineklara ring dead on arrival ng mga doktor si Pereyra.
Sa ngayon, nagpapatuloy pa rin ang isinasagawang imbestigasyon ng mga awtoridad hinggil sa nasabing insidente.
