Dae mababa sa 49 katawo an binawian nin buhay, kabali an apat na aking estudyante, makalihis an mahewasan na pag-uran asin landslide sa Eastern Cape province kan South Africa, sigun sa mga opisyal kan Miyerkules (local time).
Sigun ki Eastern Cape Premier Lubabalo Oscar Mabuyane, kabali sa mga nagadan an apat na aki, sarong driver, asin sarong conductor kan school minibus na tinangay kan baha harani sa siyudad kan Mthatha.
Apat pang estudyante an padagos na pinaghahanap mantang tolo an naisalbar.
Pigkakarkulong malangkaw pa an numero kan mga nagadan mantang nagpapadagos an search and rescue operations sa mga lugar na matinding tinamaan kan kalamidad.
Dugang pa ni Mabuyane, kakaiba an kusog kan uran asin pagbagsak kan niyebe ngunyan na taglamig.
Sigun sa mga opisyal, kadakol nin komunidad an nalubog sa baha, asin ginatos na pamilya an paramientras na nasa mga evacuation center sa tahaw kan malipot na panahon.
Apektado man an mga imprastruktura, kabali na an kuryente asin suplay kan tubig.
Pighayag man ni South African President Cyril Ramaphosa na padagos na tumutugon an National Disaster Management Centre sa mga krisis. Mientrastanto, nangapodan man an mga opisyal nin dugang na kagamitan asin tabang, orog na ta sarong helicopter sana an presenteng nagagamit sa lugar.
Nagpatanid man an national weather service na magpapadagos pa an raot kan panahon hasta sa katahawan kan semana.
Basado sa Green Climate Fund, an South Africa an vulnerable sa epekto kan climate change, na nagkakawsa kan mas madalas asin mas matinding pagbaha, tagtuyot, asin wildfire.
