Ipapaotob kan mga awtoridad an mahigot na lakdang sa seguridad durante kan Traslacion Procession bilang parte kan preparasyon sa piglalaoman na pagdagsa kan mga deboto asin bisita sa Ciudad nin Naga.
Sa intrevista kan Bombo Radyo Naga ki PCOL. Tyrone R. Dotimas, Provincial Director, CSPPO, sinaysay kaini na partikular na babantayan kan mga otoridad an mga indibidwal na nag-inom nin arak tangani na maibitaran an anuman na insidente na posibleng makadisturbo sa kaayusan asin kaligtasan kan prusisyon.
Pinapagiromdoman ni Dotimas an publiko na makikooperar sa mga otoridad asin magsunod sa mga pigpapaotob na lakdang sa seguridad asin crowd-control.
Pig-eenkaminar man kan opisyal an mga deboto na magmantinir nin disiplina, likayan an pag-inom nin arak sa mga lugar na sakop kan seguridad asin tulos na ireport sa mga awtoridad an ano man na makaduda na gawi o insidente.
Katuyuhan kan mahigot na lakdang sa seguridad na maseguro an sarong ligtas, areglado asin matoninong na Traslacion, orog na sa piglalaoman na pagdatong kan rinibong mga deboto sa ciudad.
