Pigsierto kan Palasyo ki Vice President Sara Duterte na dai gagamiton kan administrasyon ni Pres. Marcos an Philippine National Police o PNP bilang kasangkapan tanganing kulugan ini o an saiyang mga tagasuporta.
Ini an pahayag kan Presidential Communications Office matapos magsabi si Duterte na nababahala ini para sa saiyang buhay asin dai ini nagtitiwala sa pulisya, korte, asin maski sa security team na nakatalaga sa saiya.
Sigun ki Palace Press Officer Claire Castro, dai itutugot kan administrasyon na gamiton an PNP sa ano man na klase nin karahasan.
Tinawan-doon kan PCO na ginagampanan sana kan PNP an mandato kaini sigun sa batas, na mayo nin pagkiling o konsiderasyong pampulitika, asin para sa kapakanan kan gabos na mga Pilipino.
Dagdag pa kan palasyo an pagtitiwala kaini sa liderato asin sa labi 230,000 tauhan kan PNP na, sigun sa sainda, padagos na naggigibo nin propesyonal na trabaho sa pagprotekta kan mga derechos kan mga tawong nasa saindang nasasakupan.
Pig inkaminar man kan administrasyon si Duterte na ipaagi sa mga legal na proseso an ano man na reklamo o kahaditan dapit sa mga aksyon kan pulisya, imbes na magpaluwas nin mayo nin basehan na mga alegasyon.
Mientrastanto, pigsierto ni PNP Chief Gen. Jose Melencio Nartatez Jr. na sisimbagan kan pulisya an mga kahaditan ni Duterte dapit sa saiyang seguridad.
Inatasan na an mga kinauukulang police units na padagos na mag-monitor asin magsagibo nin threat assessment laban sa bise presidente asin sa saiyang immediate family.
Mientrastanto, sinabi kan PNP na sagkod ngunyan, mayo pa ini nin natukoy na beripikadong huma laban ki Duterte o sa saiyang pamilya.
Nagpoon an pangamba ni Duterte sa saiyang seguridad kasunod kan pagpaluwas nin arrest warrant laban sa saiya dahil sa tolong (3) bilang nin grave threats laban ki Pres Ferdinand Marcos Jr., First Lady Liza Araneta-Marcos asin dating House Speaker Martin Romualdez.
Nagpiyansa si Duterte nin P360,000 sa Quezon City Regional Trial Court kan Sabado.
An kaso nag-ugat sa saiyang online press conference kun sain sinabi niya na nakaulay niya an sarong tawo tanganing ipagadan sina Marcos, Araneta-Marcos asin Romualdez kun siya mismo ipagadan man.
Antes naglaog sa korte, sinabi ni Duterte na dai siya nagtitiwala sa pulisya asin natatakot siya para sa saiyang buhay asin sa saiyang pamilya.
Mientrastanto, an PNP an nagin pangunahing tagapagpautob kan kampanya kontra droga kan administrasyon kan saiyang ama, an dating Pangulong Rodrigo Duterte, kun sain rinibong mga hinihinalang drug suspects an nasawi.
Sa mga imbestigasyon kan National Bureau of Investigation asin Commission on Human Rights, natuklasan man na may pipira na pulis na umano’y sangkot sa pagmamanipula kan crime scenes asin pagbugtak nin ebidensiya tanganing mapugulan an imbestigasyon.
