Nagtao an Malacañang nin kasiguraduhan ki Vice President Sara Duterte asin sa saiyang mga kaalyado na an Philippine National Police (PNP) dai gagamiton laban sainda, ini matapos niyang ipahayag an saiyang pagkatakot para sa saiyang buhay asin kawaran nin tiwala sa pulisya.
An Presidential Communications Office (PCO) nagklaro na an administrasyon ni Marcos dai papayagan na gamiton an PNP sa ano man na klase nin karahasan o politikal na pagpapasakit.
Idinugang kan PCO na an PNP nagtatrabaho sana segun sa saiyang mandato, na uyon sa ley, na mayong politikal na pagkiling, asin para sa kapakanan kan gabos na Pilipino.
Hinimok man kan administrasyon si VP Duterte na idaan sa legal na paagi an ano man na reklamo o pangamba manungod sa mga hiro kan pulisya, imbes na magpaluwas nin mga alegasyon na mayong basehan.
Nagtao man nin kasiguraduhan si PNP Chief Gen. Jose Melencio Nartatez Jr., asin sinabi na an mga yunit kan pulisya inatasan nang padagos na mag-monitor asin magsagawa nin threat assessment para sa Bise Presidente asin sa saiyang pamilya.
An mga pangamba ni Duterte sa seguridad nagpoon kasunod kan pagluwas nin arrest warrant laban saiya huli sa kaso nin grave threats laban ki Presidente Ferdinand Marcos Jr., First Lady Liza Araneta-Marcos, asin dating House Speaker Martin Romualdez, kun sain siya nagpiyansa.
An kaso nag-ugat sa saiyang online press conference kun sain sinabi niya na nakaulay niya an sarong tawo tanganing ipapatay an mga nasambit na opisyal kun siya mismo an mapatay.
