NAGA CITY- Nareseber na kan mga paraoma sa banwaan nin San Fernando, Camarines Sur an manlaen-laen na tabang gikan sa magkakanigong opisina.
Sa entrevista kan Bombo Radyo Naga ki Allan Salvador, Municipal Agriculturist Officer kan LGU-San Fernando, sinaysay kaini na kan nakalihis na Enero 8 hasta 9 nagkaigwa nin distribution sa paagi kan Philippine Crop Insurance Corporation nin indemnity o cash assistance sa mga paraoma na naapektaran kan Bagyong Kristine.
Nag-abot soboot sa nasa P2,397,786.25 an naidestrebwer na cash assistance para sa mga paraoma na nakapagfile kan saindang notice of loss.
Apwera digde, nagdestrebwer man nin fuel subsidy card na igwang laog na P3-K para sa nasa 420 na rice farmer na gikan man sa Department of Agriculture.
Sigun ki Salvador an nasambitan ng tabang an dakulang katabangan sa lado kan mga paraoma na padagos na nagbubuhat gikan sa epekto kan nakalihis na Bagyo.
Sa ngunyan, pig-enkaminar na sana kan opisyal an mga paraoma na mag-isip nin alternatibong mapagkukuanan nin kita o hanapbuhay orog na ngunyan na padagos na namamatean an epekto kan Shearline na padagos na nakakaeskperyensiya nin pag-uran.
