Nangapodan an World Health Organization (WHO) sa mga gobyerno sa bilog na kinaban na higotan asin pakusugon an buwis sa mahahamis na inumon asin mga inumon na igwang alcohol tanganing mapugolan an pagdakol kan mga helang asin maisalbar an mas kadakol na buhay.
Sigun sa WHO, an hababang buwis sa kadakol na nasyon an nagigin rason kun tano nagtitinir na barato an sugary drinks, asin arak na nag-aambag sa pagdakol kan obesity, diabetes, helang sa puso, kanser, asin mga danyos dara kan pag-inom nin arak, orog na sa mga kajovenan.
Sinaysay ni WHO Director-General Tedros Adhanom Ghebreyesus na an paglangkaw kan buwis sa mga produktong nakakaiba sa salud siring kan mahahamis na inumon, sigarilyo asin arak an makakatabang tanganing mabawasan an labi na pagkonsumo asin makalikom nin pondo para sa importanteng serbisyong pangsalud.
Basado sa report, 116 nasyon na an nagpataw nin buwis sa sugary drinks siring kan softdrinks, alagad nagtitinir na haros mayong busiws an iba pang high-sugar products siring kan 100% fruit juices, sweetened milk drinks asin ready-to-drink na kape asin tsaa.
Mientrastanto, 167 nasyon man an nagpataw nin buwis sa arak asin 12 an igwang kabilogang pagbabawal sa pagpapabakal kaini.
Siring man, sigun sa WHO, mas nagin abot-kaya pa man an arak sa kadakol na ansyon huli ta dae nagsasabay sa inflation asin pagdakula kan kita an piglalangkaw na buwis.
Binanggit man na dae mababa sa 25 nasyon, kadaklan sa Europa an nagtitinir na mayong buwis an wine sa ibong kan malinaw na huma kaini sa salud.
Ipinunto kan WHO na nagtitinir na hababa an parte kan buwis sa presyo kan aral—14 porsiyento sa beer asu 22.5 porsyento sa spirits-mantang nasa poco mas o menos 2 porsiyento sana kan presyo kan karaniwang softdrink an buwis sa mahahamis na inumon.
Dugang pa kan WHO, kakadikit sana an mga nasyong regular na pigpapakarhay an buwis basado sa inflation, rason tanganing padagos na magin mas barato an mga produktong nakakaraot sa salud.
