NAGA CITY- Pigtawan duon kan Barangay Kapitan kan Caroyroyan, Pili Camarines Sur an importansiya kan matanos na pag-segregate nin basura.
Sa entrevista kan Bombo Radyo Naga ki Jerry Canave, Barangay Kapitan kan nasambitan ng lugar, sinaysay kaini na kinakaipuhan na maintindihan kan saindang mga nasasakupan sa paagi kan barangay assembly an saindang dakulang responsabilidad sa pagmantinir nin kalinigan kan kapalibutan orog na ngunyan na naaeksperyensiyahan an pag-uuran.
Sigun pa ki Canave, padagos soboot an saindang pag-edukar sa mga tawo komo paagi tanganing marumduman kan mga ini an saindang mga ambag sa kalinigan kan komunidad.
Dugang pa kan opisyal, dae pwedeng ilaom na sana kan ibang mga tawo an saindang basura sa iba nin huli ta igwa ining dakulang epekto sa kapalibutan siringman mawawaran nin disiplina an publi sa siring na paagi.
An kinakaipuhan sa ngunyan, an pagtarabangan tanganing ma-enkaminar an gabos sa pig-aapod na proper waste disposal na kun saen gabos an kaipuhan na maghiro tanganing mangyari ini.
Sa ngunyan, hagad na sana ni Canave an kooperasyon kan saindang mga nasasakupan para sa ikakarahay kan saindang banwaan.
