NAGA CITY- Piglalaoman na kan sarong asosasyon sa siyudad nin Naga an matumal na barakalan kan saindang produkto ngunyan na kapaskuhan.
Sa entrevista kan Bombo Radyo Naga ki Hernan Hipolito, President kan Naga City Smile Vendor Association, sinaysay kaini na kan nakalihis na taon nasa 38 na miyembro an saindang grupo alagad ngunyan an nagpakol na sana poco mas o menus 34.
Sigun ki Hipolito, an mismong contructor na nakatalaan na magrenovate sa plaza rizal an nagtugot man na ipagamit muna sainda an Kinastilyohan road ngunyan na kapaskuhan orog na ta dae paman ninda ini gagamiton.
Dugang pa kan opisyal, pinagpopokusan na sana ninda ngunyan an pagtutugot an contructor na pagamiton sa sainda an nasambitan ng pwesto asin dae na sinda naghanap pa nin ibang pwesto orog na ta surudok na an aldaw.
Mientrastanto, naglalaom man an saindang lado na magigin matumal an bentahan ngunyan nin huli naman sa pinagdeklarar kan mga eskwelahan na mayo sindang isasagibong Christmas party.
Apwera pa digdi, an haros paninda man kan saindang grupo an mga pang exchange gift.
Dugang pa kan opisyal, naaapektaran pa an saindang bentahan kan mga nauusong bentahan sa online, alagad an pinakatarget na sana soboot ninda an mga kustomer na nagtatrabaho nin banggi.
