NAGA CITY- Padagos an MDRRMO Sagñay sa saindang pigkukundusir na Basic Life Support Training sa gabos na barangay sa saindang banwaan.
Sa entrevista kan Bombo Radyo Naga ki Noli Pielago, Operation Head kan MDRRMO Sagñay, sinaysay kaini na obheto soboot kan nasambitan ng programa an tanganing matawan nin magkakanigong impormasyon asin madevelop an kakayanan kan lambang nasa barangay na makapagresponde sa mga emerhensiya.
Sigun pa sa opisyal importante na igwang kakayanan an mga nasa barangay orog na an mga nagbibilog kan Barangay Council nin huli ta an mga ini an pigkokonsederar na mga First Responder sa panahon kan pangangaipuhan.
Katakod kaini, dae man soboot gabos na personahe ninda an nagpapasiring sa barangay, igwang nawawalat sa saindang opisina tangani man na magresponde sa mga apod gikan sa iba pang mga areas.
Nagpasalamat man si Pielago sa 19 barangay sa saindang banwaan huli sa kooperasyon asin pagtabang kan mga ini tanganing matrayumpong maikundusir an nasambitan ng aktibidad.
Sa ngunyan, pig-enkaminar na sana kaini an saindang mga residentes na tolos na ipaabot sa saindang opisina kun igwang mga concern o kahaputan.
