NAGA CITY- Haros mayo nang mapagbugtakan nin namamateang excitement an mga taga suporta ni Rachel Peters sa Bicol, pirang oras antes an saiyang laban sa Miss Universe na nakatalaan na gibuhon ngonyan na aldaw sa Las Vegas.
Atyan sana, arog kan naipromesa ni Camarines Sur Governor Migz Villafuerte, bubukasan man an free viewing sa Camarines Sur Watersports Complex (CWC) sa banwaan nin Pili mantang susog man sa tiyuon ni Rachel na si Ernie Obregon, bubukasan man an public viewing sa lugar kan mga kaparyentes kaini sa Canaman.
Sigon ki Obregon, sinda pa suboot an mas nakakamate nin kaba sa nasambitang kompetisyon mantang nahihiling man ninda na relax na relax an Bicolana Beauty.
Mientrastanto, susog man sa report ni Bombo Correspondent Carlo Villa, makusog asin bilog an suporta kan Filipino Community sa Las Vegas asin kampante an mga ini na makusog an laban ni Rachel sa nasambitang prestihiyosong kompetisyon.
Dawa kadakol an nagpansin sa venue ngonyan kan Miss Universe huli ta mas sadit ini kumparar sa naenot na venue nagtutubod si Villa na magiging magayon asin makolor an kabilugang beauty pageant.
