NAGA CITY-Mahigot na susunudon kan mga employer an bagong minimum wage makalihis aprubaran kan NCR Wage Board an ₱35 na dugang sweldo para sa mga obrero sa pribadong sektor sa rehiyon.
Sigun sa Philippine Chamber of Commerce and Industry (PCCI), saindang pigrerespeto an desisyon kan regional wage board asin striktong susunudon an bagong daily minimum wage na ₱645 gikan sa ₱610.
Pigduon man kan grupo na rasonable an bagong wage hike kumparar sa prosopwestong ₱100 na labi soboot sa lado kan mga employer asin posibleng magkawsa nin pagsasarado kan mga negosyo asin pagkawara nin trabaho kan mga obrero.
Importante soboot na ikonsiderar an epekto kan paglangkaw kan minimum wage sa mga negosyo na mapipiritang mag-adjust sa mas halangkaw na labor costs partikularmente na para sa micro, small and medium enterprises(MSMEs).
Nagtutubod man an grupo na saro ining win-win decision para sa mga employer asin mga obrero.
Mientrastanto pigsambit kan grupo na saindang babantayan asin susurion an epekto kaini sa mga sararadit na negosyo na saindang pigtatrato na backbone kan satuyang ekonomiya.
