NAGA CITY- Pig-enkaminar kan sarong konsehal sa siyudad nin Naga an publiko na magin preparado sa kalamidad na pwedeng magtama sa nasyon.
Sa nagin paghampang sa mga kagawad kan media ni Naga City Councilor Omar Buenafe, sinaysay kaini na magin basehan kan mga dapat na lakdang na gibuhon an nakalihis na Bagyong Kristine kun saen naeksperyensiyahan sa Naga City asin iba pang lugar sa Camarines Sur an epekto kan labing pagbaha.
Sigun sa opisyal kaipuhan na magin angkop an mga itutugdok na harong, edificio, subdivision asin iba pang pasilidad sa pangangaipuhan sa presenteng panahon orog pa ta naeeksperyensiyahan na an epekto kan Climate Change.
Dugang pa kan konsehal dapat man ikonsederar an gabos orog na an mga piglalaoman na pagtama kan mga bagyo asin iba pang kalamidad tanganing magin salbado an publiko.
Kasabay kaini, liwat man na pinasalamatan ni Buenafe an gabos na mga rescue team sa saindang marekas na pagresponde sa mga apod kan mga tawong nangangaipuhan orog na an mga na-trap sa tubig baha.
Dakulang bagay soboot ini sa pagpapababa kan mga nairehistrong casualties sa kasagsagan kan nasambitan ng bagyo.
Sa ngunyan, hagad na sana kaini na magsunod an publiko sa anuman na abiso kan saindang kanya-kanyang LGU orog na sa panahon kan kalamidad.
