Sinabi kan kampo ni Bise Presidente Sara Duterte na mamonitor sana ninda an plenary deliberations kan Kamara ngunyan na Lunes, huli ta nakatalaan na magboto an mga mambabatas sa kaso na impeachment kontra sa bise presidente.
Segun kay Atty. Michael Poa, tagapagtaram kan legal defense team ni VP Sara, dae sinda pisikal na maatendir sa plenaryo asin envez imonitor sana an resulta kan boto.
Sinabi man kaini na dai sinda mag-espekulasyon kun maabot an kinakaipuhan na 1/3 vote o 106 na boto hale sa 318 na miembros kan Kamara tanganing maipasar an Articles of Impeachment sa Senado.
An impeachment complaint base sa joint complaint na isinangat ni Fr. Joel Saballa asin Atty. Nathaniel Cabrera. An mga alegasyon kabali an culpable violation kan Konstitusyon, suhol, graft asin korapsyon, pagtraydor sa tiwala kan publiko, asin iba pang mga seryosong akusasyon.
Pigsierto kan kampo ni Vice President Sara Duterte na andam siyang atubangon an impeachment trial kun ipadara ini sa senado.
Mientrastanto, sinabi ni Senate President Pro Tempore Panfilo Lacson na kokontrahon niya an anuman na pagprobar na harangon an pag-conven kan Senado bilang impeachment court enkaso maresibi ninda an Articles of Impeachment.
