NAGA CITY – Pig-abisuhan kan Civil Service Commission-Camarines Sur an mga ma-file para sa civil service examination sa March 2026 na bawal na mag-file sa saindang opisina.
Sa entrevista kan Bombo Radyo Naga ki Ma. Dolores Detera Salud, Director II, Civil Service Commission, Camarines Sur Field Office, sinaysay kaini na duwang beses sa sarong taon an pigkukundusir na eksaminasyon digde kun saen ini man nangyayari tuyong bulan nin Marso asin Agosto.
Katakod kaini, an pag-file man sa nasambitan ng eksaminasyon sa maabot na Marso sa sunod na taon an mapuon sa bulan nin Nobyembre, kaya man sigun ki Salud kun magbukas na an saindang slot tulos na magpasiring sa saindang online system tanganing makakua man nin slot sa gigibuhon na eksaminasyon sa masunod na taon.
Mientrastano, an nasambitan man na komisyon an dae na ma-akseptar nin mga ma-file sa civil service examination sa saindang opisina asin ini man pigsasagibo na sa saro sa mga mall digde sa siyudad nin Naga na kun saen madali na para sa mga ma-file na mag-asikaso kan sainda man na mga kakulangan na dokumentos.
Dugang pa kan opisyal, saro pa man sa rason kun tano pigbalyo na ninda an filing kan eksaminasyon sa ibang lugar iyo an tanganing malikayan an siksikan, asin malikayan man an paghalat sa luwas kan saindang opisina kun saen an iba sa luwas na nagtuturog tangani sanang maka-secure nin slot.
Sa ngunyan, pagiromdom na sana ni Salud orog na sa mga mawot mag-file para sa civil service examination sa masunod na taon, na sa oras na makakua nin slot maghalat sa pag-anunsyar kan venue, asin siertuhon na areglado na gabos an pighahagad na dokumentos tanganing sa pag-file, tulos na maasikaso kan komisyon an saindang mga pangangaipuhan.
