NAGA CITY – Tinawan duon kan sarong abogado na dapat na talagang gusto kan sarong tawo na pag-adalan an ley antes ining magklase nin law.
Sa entrevista kan Bombo Radyo Naga ki Atty. Queennie Anne Rojano, sarong legal practitioner, sinaysay kaini na dapat na aramon muna kan sarong tawo kun talaga ba na mawot kaining mag-adal nin law.
Tinawan duon man kaini na an pag-aadal nin anuman na propesyon an dae dapat magbase sa kamawotan kan mga magurang o kan sisay man. Ini nin huli ta an paglaog sa Law School an sarong committmment na mangangaipuhan nin kadakol na oras, energy asin pasensya, kun kaya kaipuhan na pag-isipan muna ini nin marhay.
Apwera pa digdi, dapat man na kayang intindihon kan pamilya o partner an sitwasyon kan sarong lawyer huli ta kadakol na mga social gatherings asin importanteng events sa buhay an pupwedeng mapalagpas asin dae ma-attendiran kan sarong abogado huli sa saiyang propesyon.
Ikaduwa, dapat man na aram kan sarong tawo kun ano ba an saiyang purpose sa pag-aadal nin law o enkaso na magin sarong lawyer na sa futuro asin kun eyo ba talaga ini an saiyang passion.
Pinakaimportanteng aspeto man sa paglaog sa Law School an pagigin masipag sa pagbabasa asin pagkakaigwa nin marhay na study habit.
Ini nin huli ta pag-abot sa law school iba na an dalagan kan buhay asin dae na tutukduan kan mga professor an mga estudyante bakung siring sa highschool asin elementarya kun kaya kaipuhan na makanuod nin mga bagay bagay sa paagi kan pag-aadal.
