NAGA CITY – Dae muna soboot sisingilon kan renta an mga negosyante sa Bicol Central Station sa siyudad nin Naga sa laog nin sarong bulan.
Sa nagin paghampang sa mga kagawad kan media ni Nonoy Reforsado, Bicol Central Station Operation Manager, pigsaysay kaini na ngunyan na bulan kan Nobyembre pigtawan soboot kaining instructions an saindang admin na dae muna magpadara nin statement of account huli ta piglalaoman kaini na maaaprubahan an ordinansa na kun saen nakapalaman na pig-waive an bayad para sa bulan nin Nobyembre kan mga stall holders na nadanyaran kan Bagyong Kristine.
Dugang pa ni Reforsado na ini an mga negosyante na nagrerenta sa sarong facility na kabali sa Local Economic Enterprise kan siyudad na kaipuhan tabangan.
Pigtawan duon ni Reforsado na an nasmabitan ng lakdang an magigin dakulang tabang sa mga negosyante na makapag-focus sa saindang negosyo.
Sigun pa sa opisyal, sa laog kan sarong bulan an focus kan mga ini iyo an mga maka-recover sa mga danyos asin dae na iisipon an bayad sa renta.
Kun hihilingon soboot nag-improve na an income kan terminal na kun saen gikan sa 3.6-3.8 million na average puon sa bulan kan January hasta sa bulan nin May nagpakol ini sa 4.6 million.
Alagad kan mga nakalihis na kalamidad dakulaon an nagin epekto sa operasyon kan terminal, asin mahihiling soboot na an income kan nakalihis na bulan ni Oktubre nagbwelta sa 3.6 million asin ngunyan na Nobyembre mababawasan pa soboot ini huli man ta nagkaigwang pagpundo sa operasyon asin dae pagsingil sa mga renta.
