NAGA CITY – Sinaysay kan Cybercrime Investigation and Coordinating Center (CICC) na gikan sa pagpapadara nin text messages, ngonian an ginagamit na kan mga iskamer an online messaging tanganing makapanggoyo nin GCash user.
Sinaysay ni CICC Executive Director Alexander Ramos na an scam an presenteng pigpapadara sa paagi kan Viber asin Facebook Messenger sa halip na sa mga karaniwang SMS messages.
Soboot an pagkakaigwa nin scam sa mga online messaging platform na ini an nagpapahiling nin epekto kan SIM Registration Act o Republic Act No. 11934. Kaibahan man sa mensahe an sarong link na naghahagad sa mga user na itao an saindang personal asin mga detalye nin account.
Nagpatanid man ini sa publiko na perming likayan an pag-click sa mga link hali sa dae bisto o kahina-hinalang mga nagpadara.
An mga biktima kan nasambitan ng mga scam an pupwedeng makipagkoordinar sa hotline kan Inter-Agency Response Center (IARC) sa paagi kan pag-apod sa 1326.
Marurumduman na kan nakalihis pa sanang taon, na-block kan GCash an 4 na milyong account asin pighali an 810-phishing site, asin 45,000 malisyosong post sa social media komo parte kan saindang pagsimbag kontra sa panloloko.
