NAGA CITY- Nakabweltada na sa saindang mga kaharongan an mga residente na nag-ibakwar makalihis an pagputok kan Mt. Bulusan sa Sorsogon.
Sigun sa Department of Social Welfare and Development, padagos man giraray an saindang monitoring sa mga biktima tanganing masierto na magigin marhay an saindang pagbuhay.
Katakod kaini, pigsaysay ni Irene Dumlao, tagapagtaram kan DSWD na an limang evacuation centers kun saen paramientras na nagdadagos an mga biktima an nag-untok na sa saindang operasyon.
Dugang pa ni Dumlao, an mga personahe kan DSWD-Bicol an nagtabang sa mga evacuees na makapuli nin salbado.
Marurumduman puon kan magputok an bulkan kan nakalihis na April 28, an DSWD nakapagtao nin nasa poco mas o menos P22-M na kantedad kan humanitarian aid, kabali na an family food packs, hot meals, potable water asin non-food essentials siring kan kitchen, hygiene kits asin water filtration units sa mga apektadong residentes.
Sa ibong kaini, pigsierto man ni Dumlao na preparado pa man giraray an saindang ahensiya na magdestrebwer nin relief supplies kun kakaipuhanon.
Igwa soboot P3-M na standby funds an DSWD-Bicol siringman igwang P205-M na kantedad kan relief goods.
Pigsaysay man ni DSWD Secretary Rex Gatchalian na an ahensiya matao nin financial assistance sa mga naapektaran na mga residentes.
Sa ngunyan, an Bulkang Bulusan nagtitinir sa Alert Level 1.
