Napauktaba nin labi sarong oras an mga tren sa Italy huli sa pinagtutubudang sabotage, makalihis na masulo an mga kable kan tren kasabay kan pagkundusir nin Winter Olympics sa Milan asin Cortina d’Ampezzo puon pa kan nakalihis na Pebrero 6.
Apektado an mga serbisyo sa pag-ultanan kan Naples asin Rome, siringman an linya pasiring norte sa Florence.
Kinondena man ni Transport Minister Matteo Salvini an insidente asin nangapudan nin paninimbagan para sa mga responsable siring kan kaparehas na problema na naeksperyensihana kan ahensya kan nakalihis na semana.
Pig-iimbestigaran na ngunyan kan mga otoridad an soboot nasulo na mga kable sa sarong seksyon kan high-speed line sa pag-ultanan kan Rome asin Naples, pati na man an duwang posibleng kaso kan vandalism sa Kabisera asin sa Florence.
Kan nakalihis na Sabado, enot na aldaw kan Winter Olympics, pig-ako kan sarong anarchist group an responsibilidad kan pag-atake sa network harani sa Bologna.
Kun saen naraot an imprastraktura kan riles na nagkawsa nin labi sa 2-oras an pagkauktaba sa high-speed, Intercity, asin regional train services.
Padagos an imbestigasyon tanganing maaraman an mga suspek asin malikayan an dugang na pagkauktaba sa transportasyon mantang nagpapadagos an torneo.
